Saturday, April 20, 2013

శిశిరంలో అకస్మాత్తుగా...

ఆకాశ పుష్పమొకటి విచ్చుకుని
ఫక్కున నవ్వినట్టుంది.

ఇన్నాళ్ళుగా అది దాచుకున్న
ఎక్కడెక్కడి సుందర దృశ్య వీక్షనానుభూతులో
ఇక్కడ తేనెజల్లై కురుస్తూ...

జోరు వాన
మువ్వల సవ్వడి వింటూ
ధ్యాన ముద్రలో ఈ క్షణాల్ని
తనువారా శ్వాసిస్తుంటే

మనసు మళ్ళీ విచ్చుకుంది. 

(పాలపిట్ట మార్చ్ 2010 మాసపత్రికలో ప్రచురితమయింది)

Friday, April 19, 2013

గుప్పెడు పూలు

ఎండిన రెప్పలపై
తడి మబ్బొకటి పరుచుకుంటుంది...
విసుగెత్తిన గుండెలో
చినుకుల సవ్వడి.
నా దారుల్లో ముద్రలేస్తూ
పసిపాదాలు నడుస్తున్నప్పుడు...
గుప్పెడు పూలు
గదినిండా వికసిస్తాయి.