జలపాతం

ఆ జలపాతం ముందు
దోసిలి పట్టుకుని
ఎంతసేపుగా నిలబడ్డాను?

నిండినట్టే నిండి
తిరిగి తన అస్తిత్వంలోకే
ఆవిరైపోతూ...కవ్విస్తూ...

తడిసిన మనసు సాక్షిగా
అందీ అందని సంతకం కోసం
తెల్ల కాగితం విరహించిపోతోంది

అలుపెరుగని నృత్యానికి కూడా
చలించని ఈ బండరాళ్ళలో
కానీ కానని  చిరునవ్వేదో
దోబూచులాడుతూ...చిక్కుముడి విప్పుతూ.

మనిషి కందని రాగంతో
సాగిపోతున్న అంతులేని పాటలో
అపురూపమైన రహస్యమొకటి
అర్థమయ్యీ కానట్టు...

తన సమక్షంలో
నిమేషించని కన్నుల సాక్షిగా
విలీనమైపోతూ కూడా
అందుకోలేకపోతున్నాను...