Thursday, July 31, 2014

ఈ రాత్రి

ఈ రాత్రి
ఒక ఖాళీ పాత్ర
సశేష స్వప్నాలైనా
ఇందులో రాలి పడవు.

ఈ రాత్రి
ఒక నిశ్శబ్ద నది
ఏ వెన్నెల పూలూ
దీని దేహం పైన విచ్చుకోవు.

ఈ రాత్రి
అనంతాలోచనాంబుధిలో
విఫలమవుతున్న వల
ఏ జలచరమూ
దీనికి చిక్కదు.

కానీ ఎప్పటికైనా ...
ఈ రాత్రి
ఉషోదయానికి గురిపెట్టిన శరమై
నైరాశ్యపు వింటి నారిని విడవాల్సిందే
ప్రభాతకాంతిలో మునిగి
దరహాస రేఖల్ని ధరిస్తూ
త్రుళ్ళుతూ ప్రవహించాల్సిందే.

No comments:

Post a Comment